ڕۆمانی ماڵی پشیلەکانی هیوا قادر بەمزووانە بە فارسی بڵاودەکرێتەوە

ڕۆمانی ماڵی پشیلەکانی هیوا قادر بەمزووانە بە فارسی بڵاودەکرێتەوە

ماڵی پشیلەکان، ڕۆمانێکی مۆدێرنە و باس لە یەک مانگی کاری زۆرەملێی پەناهەندەیەکی کورد ئەکات، لە ماڵی پشیلەکان، جێگایەکە پشیلەی تیادا ئەفرۆشرێت، هەروەها جێیەکیشە بۆ بەخێوکردن و گلدانەوەی پشیلەکان.

ڕۆمانەکە دابەش بووە بە سەر بیستوچوار بەشدا، هەر بەشێک تایبەت کراوە بە یەکێک لە ڕەگەزە جیاوازەکانی پشیلەکان، کەسایەتییەکانی ناو ڕۆمانەکە زۆرینەیان ژنن، پەیوەندییەکانی نێوان مرۆڤەکان و پشیلەکان سەرلەبەری چیرۆک و ڕووداوەکان پێک ئەهێنن. بە گشتی ئەم ڕۆمانە باس لە تەنهایی مرۆڤەکان ئەکات. بەشێکی دیاری ئەو تەنهاییەش ئەکرێت ئاژەڵێکی وەک پشیلە بتوانێت پڕی بکاتەوە، هەروەها ببێت بە شەریکی ژیانی مرۆڤەکان و هۆکارێک بێت لە جوڵاندنی ڕووداوەکانی ژیانیاندا.”

مەریوان ھەڵەبجەیی و هیوا قادر

مەریوان ھەڵەبجەیی وەرگێڕی ڕۆمانی (ماڵی پشیلەکان) بۆ سەر زمانی فارسی یەکێکە لەو نووسەر و وەرگێڕانەی کە بەرهەمی نووسەره دیارەکانی کوردی وەرگێڕاوە بۆ زمانی فارسی، لە ماوەی ۲۱ ساڵ لە کاری وەرگێڕاندا ۷۰ کتێبی بە کوردی و فارسی بە چاپگەیاندووە.

ڕۆمانی (ماڵی پشیلەکان) لەلایەن خانەی چاپ و بڵاوکردنەوەی (سالس)ەوە بڵاودەکرێتەوە.

ژیانامه‌ی هیوا قادر

لە شاری سلێمانی/ گەڕەکی چوارباخ لەدایکبووە.
قوتابخانەی سەرەتای و ئامادەیی هەر لەو شارە خوێندووە.
۱۹۸۸ پەیمانگای ئیدارەی لە کەرکوک تەواوکردووە.
۱۹۹۲-۲۰۱۱ لە وڵاتی سوید ژیاوە.
۱۹۹۲ چاوە زەردەکان/ شیعر.
۱۹۹۴ کڵاوەکەم پڕە لە باران و گوڵ/ شیعر.
۱۹۹۶ ئاوێنە سەرابییەکان/ ڕۆمان.
۱۹۹۷ بووەتە سکرتێری نووسینی گۆڤاری “ڕەهەند”.
۱۹۹۸ کیشوەرێک لە خەون/ شیعر.
۱۹۹۸ هەنار/ شیعر “هەندێک لە شیعرەکانی وەرگێڕاونەتە سەر زمانی سویدی”.
۲۰۰۱ دوو کلووە بەفر/ چیرۆکی منداڵان وەرگێڕاوەتە سەر زمانی سویدی.
۲۰۰۱ سەفەرنامە/ ئەدەبی سەفەر.
۲۰۰۴ سێوی سوور/ شیعر.
۲۰۰۶ هاورێ نیگارکیشەکەم لیگیا بۆینگا. وەرگێڕانی لە سویدییەوە.
۲۰۰۶ بۆنی شەراب لە هەناسەم دێت/ ئەدەبی نامە.
۲۰۰۷ منداڵێک لەسەر مانگە/ ڕۆمان.
۲۰۰۸ دوانزە شازادە سەماکەرەکە/ چیرۆکی منداڵان، نووسینی: برایانی گریم، وەرگێڕانی لە سویدییەوە.
۲۰۰۸ یار لە باخە/ شیعر.
۲۰۰۹ ئەوەی ژیان ڕزگار ئەکات جوانییە/ کۆمەڵیک وتوێژی ئەدەبی لەگەڵ هیوا قادر.
۲۰۰۹ جورئەتی کوشتن/ شانۆ. نووسینی: لاش ئالین، وەرگیڕانی لە سویدییەوە.
۲۰۰۹ ژیان جوانە/ وتوێژ. وەرگێڕانی کۆمەڵێک وتوێژ لەگەڵ نووسەران لە زمانی سویدی و عەرەبییەوە.
۲۰۱۰ منداڵانی گەڕەک/ ڕۆمان.
۲۰۱۱ عەشق/ چیرۆکی منداڵان. وەرگێڕاوەتە سەر زمانی سویدی.
۲۰۱۱ بۆتە ئەندامی دەستەی نووسەرانی گۆڤاری سەردەم.
۲۰۱۱ گێڕانەوەیەکی شیعری لە بەندیخانەی پشووەوە/ نامە. نووسینی پاولۆ کۆیلۆ. وەرگیڕانی لە سویدییەوە.
۲۰۱۲ گفتوگۆیەک لەگەڵ ئەدۆنیسی باوکمدا/ سازدانی نینار ئیسبەر. وەرگیڕانی لە سویدییەوە.
۲۰۱۲ دیوان/ کۆیی شیعری.
۲۰۱۳ هاوینەکەی هیرمان/ چیرۆکی منداڵان، نووسینی: ستیان هۆل. وەرگێڕانی لە سویدییەوە.
۲۰۱۳ بۆتە ئەندامی ئەنجوومەن لە دەزگای سەردەم/ سلێمانی.
۲۰۱۳ بۆتە سەرنووسەری گۆڤاری ئەدەبی سەردەم، لە دەزگای چاپ و پەخشی سەردەم.