ماڵی کتێبی کوردی
کۆمەڵە شیعری «پا هەڵگرە تەنیایی» بەرهەمی موحتەرەم خوسرەوی بڵاوکرایەوە
کۆمەڵە شیعری «پا هەڵگرە تەنیایی» بەرهەمی موحتەرەم خوسرەوی لە ۱۱۵ لاپەڕەدا لە لایەن چاپەمەنی گوتار لە سەقز چاپ و بڵاوکرایەوە.
موحتەرەم خۆسرەوی
موحتەرەم خۆسرەوی نووسەر و شاعیری سنەیی، هەشتەمین بەرهەمی ئەدەبیی خۆی بە ناوی “پا هەڵگرە تەنیایی” بڵاو کردووەتەوە. ئەم بەرهەمە نوێیە کۆمەڵە هەڵبەستێکی کوردی (سۆرانی)ه لە ١١٥ لاپەڕەدا، کە لەلایەن پەخشانگای گوتارەوە چاپ و بڵاو کراوەتەوە.
هەڵبەستەکانی ئەم پەڕتووکە کۆمەڵایەتی، سۆزداری و هەندێک جار ڕەخنەئامێزن. به کوردی و کورتاسی دەتوانین بڵێین ڕەنگدانەوەیەکن لە ڕاستییەکانی ژیان له ئاوێنەی دەروونی هۆنەردا. بیرکردنەوە، ئازار، هەست، سۆز و خەیاڵ، پێکهاتەکانی هەڵبەستەیی ئەم هۆنەرەن.
هەڵبەستەکانی خودی ژیانە، بەڵام بە دەربڕینێکی هۆنیارانە و بە سەماکردنی بیر لە نێو وشەکاندا، ئەو وشە نوێیانەی کە له بێدەنگیدا لەدایک دەبن. ئەم خانمە نووسین و هۆنیاریی له ٢٧ ساڵ لەوەو پێشەوە دەستپێکردووە و حەوت پەڕتووکی دیکەی له بواری هەڵبەستی نوێی فارسی و دەروونزانیی منداڵ و هەرزەکاردا نووسیوە.
بەرهەمە هۆنیارییەکانی دیکەی بریتیە له: ” راز تازه مانی رویاها” ، ” نفیر ناگفته ها” ، “شعرهای باران خورده” ، ” نبض نگاه”.
زۆربەی ئەم هەڵبەستانە ڕەگ و ڕیشەی کۆمەڵایەتییان هەیە و خوەراکی سەرەکییان له ناو کۆمەڵگا وەرگیراوە.
پەڕتووکە دەروونزانییەکانیشی بریتیە لە:
” بزرگ شهروند کوچک” ، ” دیدن تا…دیدن” و ” والدین توانمند” .
ئەم پەڕتووکانە ڕێگاچارە نوێیەکانی پەروەردەیی تایبەت بە دایک و بابان بۆ پەروەردەی هاووڵاتیێکی هۆشیار له داهاتوودا دەخەنە بەردەست و هەروەها هونەری بینین و بیستن و قسەکردنی باشیش فێر دەکەن. لە سۆنگەیەکەوە، ڕوانگەی هونەریی وەک بناغەی سەرەکی پەروەردەیی بۆ گەشەسەندنی منداڵانی بیرمەند و وردبین و تێگەیشتوو پێشنیار دەکەن. سێ لە پەڕتووکەکانی ئەم دواییەشی دووجار چاپکراونەتەوە.
شایەنی وەبیرهێنانەوەیە کە دوو پەڕتووکی فارسیی دیکەی ئەم نووسەرە لە داهاتوویەکی نزیکدا بە ناونیشانی «هنر و زیست معاصر» و « از قصه تا زندگی( بررسی ادبیات کودک بر پایهٔ نظریههای روانشناسی )» بڵاو دەبنەوە و پێش چاوەڕوانی خوێنەران دەبن.
بۆ بەردەست خستنی کتێبی کۆمەڵە شێعری “پا هەڵگرە تەنیایی” دەتوانن سەردانی «کتێب فرۆشی شار » لە موجتەمەعی کوردستانی شاری سنە» بکەن.
من دار
تۆ باڵندە
مێشکم پڕە لە هێلانە
ئەگەر بەر لە نیشتنەوەی تۆ
لق و پۆی حەزەکانم دانەپۆشێت
شەو.
__
بە دوای زمانێکدام
جگە
لە زمانی زکماکی گوللەکان،
تا کارەساتی کتوپڕی
ڕۆڕۆی بێ وچان
بباوەرێنێت
بە هەورێشمی خەیاڵی
منداڵە کوردەکان.
_
دڵ پەنجەرەی گرتووە
بۆ قومێ دڵخۆشی
بەڵام دەستم بەر نادات
کەلەپچەی ناخۆشی.
چەنای چەن ساڵە
دەسووڕێمەوە لەم سیاسەتە
هێشتاش داخەکەم
بەشێکی گەورەم من لە بێبەشی.
__
شووشەی خەیاڵت
لە سەر ڕەفی کام دەلاقەوە
بە جێماوە
کە ماڵی شیعرەکانم
بۆنی تۆیان لێدەتکێت.
هر نوع بازنشر این متن با ذکر منبع «خانه کتاب کُردی» مجاز است.
