ماڵی کتێبی کوردی
شیکاری ناوەڕۆکیی شیعری «ئازادی»ی شێرکۆ بێکەس
جەعفەر قارەمانی [۱]
پوختە
شیعری ڕەخنەیی بە شیعرێک دەڵێن کە شاعیر شرۆڤەی بارودۆخی کۆمەڵایەتی، سیاسی و کولتووریی سەردەمێکی دیار دەکات و بە سوود‌وەرگرتن لە زمانی شیعری ئەو کێشانە دەردەخات کە لە کۆمەڵگادا ڕوودەدەن. شیعری ئازادی نموونەیەکی ئەو جۆرە شیعرەیە کە شێرکۆ بە کەڵکوەرگرتن لە هێما و وێنەی جۆراوجۆر، ڕەخنە لە بارودۆخی سیاسیی سەردەمی خۆی دەگرێت. لەو شیعرەدا ئازادی وەک ئامانجێکی دەستنەکەوتوو پێناسە دەکرێت کە لەلایەن ڕژێمە پاوانخوازەکەی بەعسەوە پشتگوێ خراوە. نیشتمان، شوێنێکە دەکوژرێت و بووەتە تاتەشۆر و تابووت. ئەو وێنانە ڕەنگدانەوەی قەیرانی شوناسی نەتەوەیی و کولتووری لە زێدی شاعیر دەردەخەن کە بەهۆی شەڕ و گەندەڵیی کۆمەڵایەتی لە مانای ڕاستەقینە دوور کەوتووەتەوە. دەردەکەوێت نیشتمان لەبری ئەوەی سەرچاوەی ژیان بێت، شوێنی مەرگ، ناشتن و داڕمانە. دووپاتی چەمکی ئازادی نەک هەر جەخت لەسەر شێواوی و قووڵایی قەیرانی ئازادی دەکات، بەڵکوو ڕاستییەکی پڕ لە ئازار وەبیر خوێنەر دەخەنەوە کە هەلومەرجەکان ناگۆڕێن و ئازادی بەردەوام لە ژێر گوشاردا دەمێنێتەوە. بەو پێیە ئەو شیعرە لە دوو لاوە جێی سەرنجە: یەکەم، ڕەخنە لە بارودۆخی سیاسی و نەبوونی ئازادی و دووەم، هەوڵدان بۆ وشیارکردنەوەی کۆمەڵگا. لەو خوێندنەوەیەدا بەو ئەنجامە دەگەین کە شاعیر بە ڕستەی پرسیاری و وشەی گوماناوی، بێ‌هیوایی خۆی بەرامبەر بە ئازادی و نیشتمان دەردەخات. دووپاتی پرسیاری سەرەتای شیعرەکە بۆ وەرگرتنی وەڵام نییە، بەڵکوو بۆ دەرخستنی ڕاستییەکی تاڵ و گوشاری دەروونی و نەبوونی هیوا، یان جوانییە. ئەو توێژینەوەیە بە شێوازی وەسفی – شیکاری ئەنجام دراوە. لە کۆتاییدا بەو ئەنجامە دەگەین کە لەو شیعرەدا، هەموو شتێک لە دەوری توندوتیژی و چەوسانەوەدا دەسووڕێتەوە.
وشەگەلی سەرەکی: شێرکۆ بێکەس؛ شیکاری ناوەڕۆکی؛ هێماخوازی؛ ئازادی
[۱] ghahjefer@gmail.com
داگرتنی تەواوی وتارەکە
هر نوع بازنشر این متن با ذکر منبع «خانه کتاب کُردی» مجاز است.
