ماڵی کتێبی کوردی
ئانتۆلۆژی کوڵەداستانێ هەورامیێ کریاوە بە فارسی
کتێبوو «زندگی حق من است لعنتی‌ها» که دوانزە کوڵەداستانێ گێرۆنه وێ و چاپەمەنیو «جغد»ی تاراننە چاپ کەردەن، بە قەڵەموو فەرشید ڕۆستەمی هەورامیوە کریا به فارسی. سەرەنج پانەیە ڕەوتوو کوڵەداستانێ هەورامیێ تازە دەس پەنە کریان، هۆرگێڵنەر دلێ گردوو ئا کوڵەداستانانە چی چن دەیەنە بە هەورامی نویسیەینێ، دوانزە داستانێ عالێش به سەلیقەو وێش هۆرچنیێنێ و بە وەڵینێوی ڕیک‌وپێک چی کتێبنە هۆرش گێڵنەینێوە.
پەنەواز بە واتەین ئینە یەرێ دەیێن ڕەوتوو ئەدەبیاتی داستانی هەورامینە دەسش پنە کەردەن و تا ئارۆ، چننە کۆداستان و ڕۆمانێ پی زوانیه نویسیەینێ. ڕەوتەکە، بە ڤەرچەم گێرتەی ویس ساڵەو ئەوەڵیشەوه، دەیەی دمایینە ئەکتیو‌تەر بیەن، نویسەرێ تازێ و دەنگێ تازێ ئامەینێنە ڕەوتەکە و ئەزموونوو وێشا نویستەنشاوە.
کوورش ئەمینی، جەماڵ جەباری، ڕەئووف مەحموودپوور، حەمەڕەزا بەهمەنی، ژوان ڕەحیمی، نایێب مێنبەری، فەهمی مورادی و موختار ئێسلامی، ئا نویسەرێنێ هەکە هەرمانەشا چی کتێبنە تەرجومە بیێنەوە.
هەر چەنی ڕۆستەمی وەڵینەو کتێبەکەینە نویسەنش، ئامانجوو ئی ئانتۆلۆژیه، ئەژناسنای ئەدەبی هامچەرخی هەورامین. پینەی ڤەردەنگ چەموو نویسەرە هەورامیاوە، تەماشەو دنیای کەرۆ و ئاشنا بۆ چەنوو ئەزموونیشا. هەرپاسە، بیاوۆنە هەکە چەمکێوە پێسەو ئەدەبی هامچەرخی کوردی، تەنیا دلێ ئەدەبی سۆرانینە کوڵ نمەبۆوە و ئەوتەر زوانە کوردیەکێ پاڵوو یۆینە، نە تەنیا هەڕەشێ نیەنێ پەی هەنترینی، بەڵکوو یاوەری مدا چەمکێوە گردین بە نامێو ئەدەبی هامچەرخی کوردی دەڵوەتمەن‌تەر بۆ.
هر نوع بازنشر این متن با ذکر منبع «خانه کتاب کُردی» مجاز است.
