ناساندنی کتێبی “پاریس” کۆمەڵە شیعری چاڕڵز بوکوسکی

ناسنامە: پاریس( کۆمەڵە شیعر): چاڕڵز بوکوسکی؛ لە ئینگلیزییەوە: عەتا میرەکی؛ چاپەمەنی “گوتار” سه‌قز؛ ۱۸۰ لاپەڕە، ساڵی چاپ: ۱۳۹۵

عەتا میرەکی(وەرگێڕ)

چاڕڵز بوکوسکی شاعیر و ڕۆماننووسی ئەمریکایی ساڵی ۱۹۲۰ لە “ئاندرناخ”ی ئاڵمان چاوی بە ژیان هەڵێنا، دوای کۆچبەربوونی بنەماڵەکەی لە ئەمریکا دەگیرسێتەوە. لە ژوورە هەرزانەکاندا دەژیا و بۆ دابین کردنی بژیوی خۆی دەستی دایە چەندین پیشەی سەخت و کەمداهات. ساڵی ۱۹۵۰ وەکوو نامەبەر لە پۆستەخانەی لۆس ئەینجڵێس کاری دەکرد.

ساڵی ۱۹۶۹ لەگەڵ ناوەندی چاپ و پەخشی Press Sparrow Black گرێبەستی ئیمزا کرد کە مانگانە سەد دۆلار وەربگرێ و لە بەرانبەردا تا ئەو دەمەی لە ژیاندا دەمێنێ وەک نووسەرێکی پیشەیی تەنها بە نووسینەوە خەریک بێ. خۆی لە نامەیەکدا ئەڵێ: دوو بژاردەم لە بەردەستا بوو، یان لە پۆستەخانە بمێنمەوە و شێت بم.. یان بێمە دەرێ و بنووسم و برسی بژیم. من برسێتیم هەڵبژارد.

یەکەم ڕۆمانی خۆی بە ناوی “پۆستەخانە” نووسی کە بیرەوەری و بەسەرهاتەکانی خۆی بوو، لەو ماوەیەدا کە وەک نامەبەر کاری دەکرد، وەکوو وەفایەک بۆ Black Sparrrow Press زۆربەی بەرهەمەکانی هەر لەو ناوەندەدا چاپ کرد.

بوکوسکی لە ساڵی ۱۹۹۴ و لە تەمەنی حەفتا و چوار ساڵیدا لە سەن پێدرۆی ویالیەتی کالیفۆڕنیا کۆچی دوایی کرد. لەسەر کێلی گۆڕەکەی نووسراوە: هەوڵ مەدە (Don’t Try). ئەو شێوازە نووسینەی بوکوسکی بە ڕیاڵیزمی پیس ناسراوە. لە نووسراوەکانیدا ڕەخنەگرانە و بە تووڕەیی باسی هەڵاواردن، هەژاری و پرسە کۆمەڵایەتییەکانی کۆمەڵگەی ئەمریکا دەکا. بوکوسکی وێڕای ژمارەیەکی زۆر شیعر، چەندین کۆمەڵە چیرۆک و شەش رۆمانی نووسیوە.

“پاریس” کۆمەڵێک لە شیعرەکانی بوکوسکی دەگرێتە خۆ، کە خۆم هەڵمبژاردوون و ئەو ناوەشم لە یەکێک لە شیعرەکانی نێو ئەم کتێبەوە هەڵگرتووە. یەکەمجارە نووسراوەکانی بوکوسکی لە قەبارەی کتێبدا بکەوێتە بەر دیدی خوێنەری کورد و زۆر خۆشحاڵم کە ئەم بەرهەمە دەچێتەوە کتێبخانەی کوردییەوە.

خاڵێکی گرنگ کە دەبێ ئاماژەی پێ بکرێ؛ ئەوەیە کە لە وەرگێڕانی شیعرەکاندا هەوڵم داوە تێم و کەشوهەوای شیعری بوکوسکی و هەروەها شێوازەکەی بپارێزم، بەڵام لە هەمان کاتدا بەپێی توانای خۆم کارم بۆ ئەوە کردووە شیعرەکان لە زمانی مەبەستدا بێ‌مانا و ئاڵۆز نەیەنە پێش چاو. پێویستە ئاماژە بکرێ کە لە کۆتایی کتێبەکەدا دەقی ئینگلیزی شیعرەکانیشم داناوە.

جێی ئاماژەیە کە ڕەچاو کردنی ماڤی نووسەران و بڵاڤۆکەکان و پاراستنی ماڤی کۆپی ڕایت، یەکێک لە خاڵە سەرەکییەکانی پەێڕەوی کاری ماڵپەڕی “ماڵی کتێبی کوردی”یە و فایلی تەواوی کتێبی “پاریس” لە سەر ئیزنی نووسەری بەرهەمەکە و وەک دیارییەک لە لایەن بەڕێزیانەوە بۆ ئەندامانی کتێب دۆستی ماڵپەڕ پێشکەش دەکرێت. بەم بۆنەوە ماڵپەڕی “ماڵی کتێبی کوردی” بە ناوی بەڕێوەبەران و ئەندامانەوە سپاس و پێزانینی تەواوی خۆی بۆ نووسەری بەڕێز عەتا میرەکی ڕادەگەینێت و دەسخۆشی دیارییە ناوازەکەیان دەکات.

! ئەم بابەتە تایبەتە بە ماڵی کتێبی کوردی و بڵاوکردنەوەی بە ئاماژەدان بە سەرچاوە  ڕێگە پێدراوە.