ماڵی کتێبی کوردی
ناساندنی گۆڤاری کۆپنهاون ژومارە یەک و دوو لە بڵاوکراوەکانی وەشانی ئەنیستیووتی کوردی کۆپنهاگ
ژینا نەقشبەندی
(ئێدیتۆری گۆڤاری کۆپنهاون و ئەندامی ئەنیستیتووت)
ئەنستیتووتی کوردی کۆپنهاگ لە وڵاتی دانمارک ئەکرێ بوترێ له ساڵی ٢٠١٦ەوە ئەندامەکانی یەکە یەکە کۆبوونەوە و به شێوەی فەرمی له ساڵی ٢٠٢٠ی زایینی‌یەوە دەستی به چالاکی کرد. ئەنستیتووتی کۆپنهاگ وەکوو مەکۆیەک بۆ گەشەکردن و پەرەپێدان به کولتوور و چاندی کوردی له هه‌موو به‌شه‌کانی کوردستان و دەرەوەی وڵاتیش له خزمەتی چالاک‌وانان و هەڵسووڕاوانی کولتوور و زمانی کوردییه و لەم ڕێگایەدا به هیوای بەرەوپێش چوون و خزمەت‌کردنه و لەو باوەڕەدایه کولتوور، ناوەڕاستی هەستیاری جـەغزی کۆمەڵگاکانە و پردی پەیوەندی و هاوڕێیەتی هەموو نەتەوەکانە.
ئەنستیتووتی کۆپنهاگ له مانگی فێبریەی ساڵی دوو هەزار و بیست‌ەوە بە فەرمی و یاسایی لە وڵاتی دانمارک دامەزراوە و خاوەنی چەند ناوەندی فەرمیی ترە که هەرکامە و بوارێکی تایبەت به کولتوور و هونەری کوردیی له ئەستۆدایه که بریتین له:
_ناوەندی هونەری پەپوو “بەرهەمهێنانی فیلم” لە ساڵی ٢٠١٦وە
_ناوەندی هونەری دەف “بەشی موزیک” لە ساڵی ٢٠١٥وە
_فستیواڵی نێونەتەوەیی کورتەفیلمی تولیپاف
_فستیواڵی فیلمی کوردی ئەنیستیتووتی کوردی کۆپنهاگ
_گۆڤاری کۆپنهاون
_ناوەندی فێرگەی زمانی کوردی
_کۆبوونەوەکانی کتێب خوێندنەوە لە ساڵی ٢٠١٦وە.
هەروەها ئەبێ ئاماژه بکەین که فستیواڵی نێونەتەوەیی توولیپاف له ساڵی ٢٠١٦ەوە بەردەوامە و ساڵی ٢٠٢٠ بە هاوکاری ئەنیستیتووتی فیلمی دانمارک و سینەما تیکێتی دانمارک بەڕێوەچووە.
شۆرای بەڕێوەبەری ئەنیستیتووتی کوردی کۆپنهاگ:
ئەرسەلان چەلەبی
ئازاد کەماڵی‌فەر
ڕەئووف “ساسان” ئاغایی
بێهرووز محەمەدی
لوقمان قاسمی
گۆڤاری کۆپنهاون ل ساڵی ٢٠٢٠ەوە دەستی پێ کرد و یەکەم چاپ‌کراوەی خۆی له ژێر ناوی “گۆڤاری کۆپنهاون ژمارەی یەک و دوو” بڵاو کردەوە و هیوایان خواستووە ئەو گۆڤارە و هەوڵەکانی تری ئەنیستیتووتی کورد ببێتە ناشوێنێکی دیار بۆ کۆبوونەوە و لێک‌نزیکبوونەوەی کولتوورە جۆراوجۆرەکان لە پانتایی زمان و ئەدەب وهونەر. هەموو دەم کولتوور و چاند خاڵی بەهێز و جێی شانازی گەلی کورد بووە و بەردەوام وەکوو ملوانکەیەکی درەوشاوە لە ڕۆژهەڵاتی ناوین ڕەنگ و بۆن و بەرامە و تامی تایبەت بە خۆی هەبووە. مشووری ئێمە لە ناو کۆی کەمترخەمییەکانی دیاسپۆڕای کورد بێ هەڵە و کەم و کۆڕی نییە. بەڵام هەموو هەوڵی خۆمان وەگەڕ خستووە هەتا ئەو گۆڤارە بە باشی تەیار بێ، هەروەها بە بەشی خۆی ببێتە مەکۆ و جێپشووی هۆگرانی هونەر و کولتوور و هەروەها جێژوانی دوو کولتووری کوردی و دانمارکی.
لە ژومارەی یەکەمدا فایلی تایبەت بە نووسەری کوردی تاراوگەنشین “حەمە فەریق حەسەن” لەگەڵە وێڕای فایلێک لە وەرگێڕانی شاعیرانی لە هەموو تەمەن و چین و توێژێکی ئەدەبی، شیعرەکانیان لە دانمارکییەوە دانمارکی کراون بە کوردی و فارسی و پێشکەش بەهۆگرانی شیعر کراوه.
وەک لە یەکەم بەیاننامەی گۆڤارەکەمان بە ڕوونی ئاماژەی پێکرابوو، ئەو گۆڤارە ئاوەڵایە بۆ هەر هەموو ژانرێکی هونەری، بابەت و توێژینەوە و هەرچی لە ناو جەغزی کولتوور و هونەردا جێ دەگرێت. هەر بۆیە ژومارەی یەکەمی گۆڤارەکە بە بابەتی تریش لە هونەرمەندانی فۆتۆگراف و کارتۆنیست تام و بۆنێکی تری بەخۆوە گرتووە.
ئەنیستیتووتی کوردی کۆپنهاگ ساڵی چوار جار ئەو گۆڤارە بڵاو دەکاتەوە، هەر جارەی لەنگەر لە سەر بەرهەمی نووسەر و هونەرمەندێکی کورد دەگرێت، چ گەنج و چ بەتەمەن، بە بێ جیاوازی، لە فایلێکی تایبەت‌دا کۆمەڵێک لە بەرهەمەکانی بڵاو دەکاتەوە و هەوڵ دەدا خوێندنەوەیەکی باش و بەکەڵک بۆ بەرهەم و کارەکانی بخاتە ئەستۆی ئەو کەسانەی خاوەنڕا و شارەزای بوارە جیاجیاکانی ئەدەبن. گۆڤاری کۆپنهاون لە هەر ژومارەیەکدا بەرهەمی هەموو نووسەران و شاعیران و بەگشتی هونەرمەندان لە هەر تەمەنێک بە بێ جیاوازی تەمەن و ئاستی کاریان بڵاو دەکاتەوە. کەڵکەڵەی گرینگ و هەوڵەکانی ئەنیستیتوو بەشی زۆری بۆ ڕەخساندنی هەل و دەرفەت بۆ گەنجانە لە ناو هەموو ژانرەکانی هونەر و ئەدەب.
گۆڤاری کۆپنهاون ژمارەی یەک و دوو:
خاوەن‌کار: ئەنیستیتووتی کوردی کۆپنهاون
شۆرای نووسەران: ئەرسەلان چەلەبی، ئازاد کەماڵی‌فەر، ژیار جەهانفەرد
بەرپرسی هونەری و گرافیک: ڕەئووف ئاغایی _ ساسان
چاپ و بڵاوکردنەوە: ناوەندی وەشانخانەی کورد لە کۆپنهاگ
هەروەها هەواڵێکی خۆش بۆ بەردەنگانی خۆشەویست ژماره سێ و چواری گۆڤاری کۆپنهاون بەڕێوەیە و لە قۆناغی پێداچوونەوە و دیزایندایه و بەو زووانه له وەرزی بەهار دێته بەر دیدەی خوێنەرانی هێژا، و فستیواڵی نێونەتەوەیی کورتەفیلمی تولیپاف لە پاییزی ساڵی ۲۰۲۱دا بەڕێوه ئەچێ و بەگشتی ۱۷۲۷ فیلم هەناردە کراوە کە لەوانه ۱۱٨ فیلمی کوردی تێدا بەشدارن.
لە کۆتاییدا سپاسی تایبەت بۆ هەموو بەشداربووانی گۆڤاری کۆپنهاون کە بوونە هاوڕێ و هاودەم. هیوادارین ئەو هاوڕێیەتییە بەردەوام بێت و لق و پۆی زۆرتری لێ بێتەوە و هەموومان بە بەشی خۆمان ببینە ئەستوونەکانی کولتوور و چاند و زمانی کوردی.
ناونیشانی ماڵپه‌ڕ و ئیمه‌یلی ئەنیستیتووتی کوردی کۆپنهاگ
