ماڵی کتێبی کوردی
خرمەی بەستەڵەک/ عەزیز وەلیانی
هەموو ساڵێ دەمەوبەهار، کوێستان لە تاو دڵی گڕگرتووی زەوی، کراسی سپی ئاودامێنی خۆی دادەماڵێ و دەتاوێ. ڕەشانگ و شیخاڵ دەکەوێتە کەژ و کۆ؛ منیش چاوی پڕتاسەم بڕیوەتە قەد و لاپاڵ و بستووەکان، بەڵکوو پۆل‌بەستی گەزیزانم دەرکەون.
هەموو ساڵێ دەمەوبەهار، چاوەڕێم گڕەمەشقەڵانی نەورۆز گڕ بەرداتە داوەڵی دزێوی دزی بێستانی ژیان، بشکێنێ شەقڵی بەسامی زاڵی شەو، تینێ بداتە کاولاشی هەناسەساردی دڵ‌کۆلاو.
هەموو ساڵێ دەمەوبەهار، دەمەوبوومەلێڵ، دەکەومە خولیای شیرینی مەستی کە دێوی ڕەشی دم‌بە‌هەرای شەو دیل و داماوی کەزێی ڕەشی کچی بەیانییە و مۆسیقام پێکەنینی مناڵان، هاژەی شەتاو و خوڕەی ڕێژەوی ئاوی ڕوونی کانییە.
بەڵام مخابن! بەڵام مخابن! ئێستاش جاڵە دەبنەوە تاوێری میحنەت بەسەر ساکە‌دەشتی ژیانمان، ئێستاش بەجێی تەیری سەرچڵ، بایەقووش بۆتە سەردولکە‌بێژی سەردەم، جێ‌مۆڵی گورگ و کەمتیارە پەرژین و پەستوی کوچە‌باغی ژیانمان.
ئاگریش لەگوێن هەتاوی ڕۆژهەڵات کەسیرەیە، بزە و بەزم بۆ جەلاب و جەردەیە.
ئێستاش خونکاری شەو، مانا و مەشقی ژیان بە ڕێزمانی پەت و نەمان دەنووسێتەوە.
بەڵێ ئێستاش کۆنەسرودی شاعیر دەڵێینەوە:
“لە شارەکەت کە ڕەمزی ئاسن و منارەیە
مەلی ئەوین غەوارەیە”
بەڵام خۆشەویستەکەم!٢ هەموو دەمەوبەهارانیش، شنەی خەم‌ڕەوێنی شەماڵ بۆن و بەرامەی جاترە‌کێویلکە و پۆل‌بەستی گوڵانی نێو پەرژین دەپژێنێ و بە ئەسپایی ودمی سیحری پیرەشاعیرم بە گوێ‌دا دەچرپێنێ:
“هۆ ئاشنا! دوور بنواڕە ئاسۆ ڕوونە”
بەڵێ! ئەو ڕۆژە هەر دێ، ئەو ڕۆژە هەر دێ چۆمیلکەیەک دەبێتە بەحری پڕشەپۆلی لێوبەکف،سەر دەسوێ تا ڕزگار بێ لە کەند و کەناری بەردین و تێل‌دڕوو تا بخەمڵێنێ بەستێن بە گوڵزاری ژیان.
ئەو ڕۆژە هەر دێ یەکەم تیرێژی گزنگی بەربەیان دەستەملانی شەونمی گوڵپەڕ دەبێ و پاش خرمەی بەستەڵەک لە کڵاوڕۆژنەی هومێدەوە، بە کۆڕ ئەم سرودە دەبیسم:
“بە ڕمبەی تۆپی زەمان، ڕەقیب داماو و عاشقان دەستەملان”
ئەودەم لە هەرێمی بەهاری سەوزی بێ‌خەزان، لە گشت لا گەڕی دیلانی دڵان گەرم و بۆنی ئەسپەندەر و سوڕی دەسرەی چۆپی بەرەو ئاسمان، خۆم چۆپی‌کێشم لە دەست دوو نەونەمامی چاوەڕوان بۆ وچان لە جێژوانی ژیان.
دەسرەی چۆپیم لکی سۆرانی بە‌جێماوی گۆڕغەریبانمە.
ئەوەی دێتە گوێم گمەی کۆتری ئاشتی و فجوقی پۆلە‌کەوی کەژ و تەلان و زۆزانمە.
ئاخ چ خۆش‌دەمێکە، چ خۆش‌دەمێکە ڕۆژپەڕانی نەورۆز، هەموو مەشخەڵ بەدەست، ڕیز‌بە‌ڕیز و شان‌بەشان بەرەو چوارچرا، بارەگای مێژووی وەفا، ئەودەم تێکڕا پڕ بزەی دڵ و هەناو بە یەک دەڵێین:
بەهارمان پیرۆز، ژیانمان پیرۆز
٢٩ی ڕەشەمەی ١٤٠٠ی هەتاوی
٢٧٢١ی کوردی، ٢٠٢٢ی زایینی
بۆ داگرتنی ته‌واوی بابه‌ته‌که ببنە ئەندامی کاناڵی تلگرامی ماڵی کتێبی کوردی…
ئەم بابەتە تایبەتە بە ماڵی کتێبی کوردی و بڵاوکردنەوەی بە ئاماژەدان بە سەرچاوە ڕێگە پێدراوە
