ماڵی کتێبی کوردی
هەڵوێستی دکتۆر بەختیار سەجادی بە بۆنەی داخستنی ناوەندی ڕۆشنگەریی چاودێر
به بیستنی هەواڵی داخستنی ناوەندی ڕۆشنگەریی چاودێر، ئەویش بەو شێوە خراپ و دوور لە بەهایە، دڵگران و ناڕەحەت بووم و ئەم کارە شەرمەزار دەکەم. دەسەڵاتی حیزبی لە سلێمانی دەیتوانی لانی کەم بە شێوەیەکی باو و برۆکراتیک لەم ڕووەوە مامەڵە بکات و بە ڕێکاری یاسایی و بە نامەکاری و ئاگادارکردنەوە ئەم هەنگاوەی جێبەجێ بکات، چونکە لە هەموو دونیا هێزی کۆماندۆ بۆ تێرۆریست و گروپی جەردە بەکارئەهێنرێت.
چاودێر گەلێک خزمەتی بە گوتاری ئەدەبی و مەعریفیی کوردی کردووە و هەوڵی داوە گیانی ڕەخنە وەک پێویستییەکی هەموو کۆمەڵگایەکی زیندوو بخاتەگەڕ. گۆڤاری مەدەنییەت، فێستیڤاڵی گەلاوێژ، پلاتفۆرمی دابڕان، بڵاوکراوەکانی ڕەخنەی چاودێر، ڕوانگە و ڕەخنە و دەیان هەوڵ و هەنگاوی ئەرێنیی دیکە تەنها هەندێ نموونەن بۆ کارنامەی دەوڵەمەندی ئەو ناوەندە کە زیاتر لە چارەکە سەدەیەکە خزمەتی بە ئەدەب، فیکر، ڕەخنە و دیمۆکراسی کردووە.
زۆر بەداخەوەم و جێگەی سەرشۆڕییە بۆ هەموو کوردستانییەکی دڵسۆز کە لە پایتەختی ڕۆشنبیریدا بەو شێوە نامۆ و توند و شەڕاژۆیانە هەڵسوکەوت لەگەڵ دەزگایەک دەکرێ کە دەوری بەرچاوی گرنگی گێڕاوە لە مسۆگەرکردنی پێگەی گوتارمەندی ئەدەب و هونەر و مەعریفە لە لایەکەوە و پەرەپێدانی پێوەندیی ڕۆشنبیری و فەرهەنگیی نێوان نەتەوەکان لە لایەکی ترەوە.
ئەم ڕووداوە توند و تاڵە لە شارێک ڕووی داوە کە هەموو کوردێک شانازیی بە مێژووی درەوشاوەی ئەدەب و هونەر و فەرهەنگەکەیەوە دەکات. بەڵام ئێستا و بە دیاریکراوی لەم ساڵانەی دواییدا هەزار مخابن بووەتە پێگەی دەرکەوتن و کاریگەریی چەندین لایەنی توندڕەو و دواکەوتوو کە نامۆن بە گیانی سەردەم و وەک گوتاری ئایدیۆلۆجیک بوونەتە لەمپەر لە بەردەم گەشەی خودی عەقڵانیی و جوانیناسانەی سوژەی کوردیدا. ئەو لایەنانە بە هۆی هەبوونی تریبوونی جۆراوجۆرەوە خەریکی ئولگووسازیی پێچەوانەن بۆ سوبژێکتیڤیتەی کوردی و کوردستانی و بوونەتە دامەزراوەی دژەمۆدێرن و هەر بەم بۆنەشەوە کوردستان بەرەو دواوە دەبەن.
لە پاڵ ئەمانەشدا، زۆر ناڕەحەت و دڵگرانم کە لە سەدەی بیست و یەکدا گوتاری ئەدەبی و هونەری و فیکری بووەتە دەستمایەی ململانێی کەسی و بنەماڵەیی و سیاسی. لەوەش خراپتر، ناڕەحەتم کە دەبینم هەندێ دەنگی دیاری دونیای ئەدەب و هونەر و مەعریفەی ئێمە، لەبەر هۆکاری جیاجیای وەک ڕکابەریی دەزگایی و دامەزراوەیی و یاخود ڕقی کەسی و بەرژوەندیی تاکەکەسی و یان حیزبی و سیاسی ئەم کارەیان ئیدانە نەکردووە. یەکەم ئەرکی ڕووناکبیر ڕەخنەکاری و خودڕەخنەکارییە.
لەگەڵ ڕێزدا
بەختیار سەجادی
تۆرۆنتۆ، ٢٨ی خەرمانانی ١٤٠٣
هر نوع بازنشر این متن با ذکر منبع «خانه کتاب کُردی» مجاز است.
