خانه / پێشنیاری ده‌سته‌ی نووسه‌ران / بەرگی ۹ و ۱۰ی «فەرهەنگی زارەکیی موکریان» بڵاو کرایەوە

بەرگی ۹ و ۱۰ی «فەرهەنگی زارەکیی موکریان» بڵاو کرایەوە

بەرگی ۹ و ۱۰ی «فەرهەنگی زارەکیی موکریان» و لەلایان «خانەی موکریانی» هەولێرەوە چاپ و بڵاو کرایەوە.

بەرگی نۆیەم کە تایبەت بە پیتی «س»ـینە ۷۹٥ لاپەڕەی وەزیری‌‌یە. دکتور محەممەد خزری‌ئەقدەم لە بەشێک لە پێشەکی‌‌یە تێروتەسەلەکەی‌دا دەڵێ:

ئەم فەرهەنگە کە لەسەر داروپەردووی پاشەواری پێشینان ڕۆ نراوە و بە تان‌وپۆی ویستێکی زانست‌خوازانەی شێوازمەندەوە تەنراوە، چوار کەڵک و کاری سەرەکیی ئەدەبی، زمانی، فێرکاری و ئەنترۆپۆلۆژیکی لە ئامێزدایە و لە سۆنگەی ئەم تایبەتمەندی و کارکردانەشە کە دەبێ بڵێین فەرهەنگی زارەکیی موکریان هۆی داوەتەوە و هەتا ئێستاش لفە و دووانەکەی پێی نەناوەتە سەر ڕووی دنیایە؛ بۆیە نە دەكرێ ئەم کارە بچێتە بەراوردکێی هیچ شتێکی تر و نە هیچ فەرهەنگێکی تریش بخرێتە پارسەنگی؛ کەوابوو دەبێ چاو لە ڕێگای هاتنی کارێکی هاوشێوە بین و جا ئەو کاتی باسی پێک‌گرتن و سەنگاندنێ بکەین.

بەرگی ۱۰ پیتەکانی «ش، ع، غ، ف» دە خۆ دەگرێ و ۹٥٨ لاپەڕەی وەزیری‌یە. دکتور حەمید حەسەنی(فەرهەنگ‌نووس و توێژەری باڵای فەرهەنگستانی زمان و وێژەی فارسی) لە بەشێک لە بۆچوونەکانی‌دا دەڵێ:

کاری وشەناسیی مەیدانی زۆر سەخت و تاقەت‌پرووکێنە. لەم بوارەدا تۆژەرانی ئەورووپایی، وەک «دەیڤید نیل مەکێنزی»، «ئۆسکار مان» و «ویلھێلم ئایلێرس» ھەندێک بەرھەمیان لێ کەوتووەتەوە. «فەرھەنگی زارەکیی موکریان»، نەک ھەر لە ناو کورد و ئێران، بەڵکوو لە ڕۆژھەڵاتی ناوین‌دا تاقانەیە. بەتایبەت کە بنەمای ئەو بەرھەمەش لەسەر تۆژینەوەی مەیدانی‌یە. «پایانیانی» ھەر بەو تاقە بەرھەمە ناوی خۆی، لە تۆژینەوەکانی ڕۆژھەڵات‌ناسی‌دا، بردووەتە ڕیزی نەمرانه‌وه.

کاک عەلی سەمیمی کارنەخشین ئەرکی لاپەڕەبەندی و ڕازاندنەوەی کارەکەی لە ئەستۆ بووە و مامۆستا عەزیز ئالی‌ی وردبین و کارزان لە باری فەننی و زمانی‌یەوە بە کارەکەدا هاتووەتەوە. ماڵە ئەوان و خانەی بەڕێوەبەرانی بەڕێزی «خانەی موکریانی» [کاک کاروان، کاک مستەفا، کاک محەیدین، کاک مەلا برایم و کاکە ساماڵ]ـیش سەدهەزار جار ئاوەدان بێ.

 بۆ داگرتنی ته‌واوی بابه‌ته‌که، ببنە ئەندامی کاناڵی تلگرامی ماڵی کتێبی کوردی…

 https://t.me/kurdishbookhouse

ئەم بابەتە تایبەتە بە ماڵی کتێبی کوردی و بڵاوکردنەوەی بە ئاماژەدان بە سەرچاوە ڕێگە پێدراوە.

درباره‌ی ماڵی کتێبی کوردی

همچنین ببینید

ژمارەی نوێی گۆڤاری مه‌هاباد چاپ و بڵاوکرایەوە.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *