خانە کتاب كُردی
قـــوتـبـەدین سادقــی: بــەختیار عـەلـی بیرمـەنـدە
لە شاری تاران بــە ئــامادەبــوونی رەخنەگــران د. قوتبەدین سادقی، محەمەد قاسم زادە، وەحید ئەمینی زادە و مەریوان هەڵەبجەیی كۆڕی هەڵسەنگاندن و مـەراسیمی ناساندنی رۆمانی بەندەر فەیلی، بەختیار عەلی، لە ناوەندی چاپ و بڵاوكردنەوەی ثالث بەڕێوەچوو.
قوتبەدین سادقی وتی: بۆ من شانازییە دەربارەی كـــتێبی رۆمـاننـووس و بیرمــەندی گــەورەی كــورد بەختیار عەلی دەدوێم، بەختیار بەردەوام بە كتێبەكانی سەرساممان دەكات و سەرنجمان رادەكێشێت، بەندەر فەیلی بەرهەمێكی هێندە گەورەیە دەتوانێت وا بكات كە هەرگیز تراژیدیا و جینۆسایدی كوردە فەیلییەكان لەبیر نەچێت و لە یادەوەریی مرۆڤایەتیدا بە زیندوویی بمێنێتەوە، وەرگێڕانی رۆمانەكە زۆر جوانە، سوپاسی مەریوان هەڵەبجەیی دەكەم كە ساڵانێكە ئەدەبیاتی كورد بە ئێرانییەكان دەناسێنێت. سادقی وتیشی: دەبێت هەمووان بەندەر فەیلی بخوێننەوە تا بەشێك لە تراژیدیای كورد و مێژووەكەی بناسن.
رەخــــنەگر محەمەد قاسم زادە وتی: رۆمانی بەندەر فەیلی، ئەزموونێكی زۆر تایبەتی بەختیار عەلییە. لە زۆربەی بەرهەمەكانیدا بەشێوازی جۆراوجۆر كاری لەسەر فاشیزم و زیندانەكان كردووە.
وەحید ئەمینی زادە وتی: بەختیار عەلی گێڕەرەوەی شووناسی بوونناسی تاكی كوردی ئازاد و سەربەخۆی ناو تراژیدیاكانە.
مەریوان هەڵەبجەیی وەرگێڕی كتێبەكە، وتی: بەندەر نموونەی باڵای مرۆڤێكە كە فاشیزم هەموو هەوڵی خۆی داوە وێنەیەكی تری پێ ببەخشێت و وا بكات خۆی نەبێت، بەڵام شكستی هێناوە.
بەندەر فەیلی چواردەیەمین كتێبی بەختیار عەلییە كە لەلایەن مەریوان هەڵەبجەییەوە، كراوە بە فارسی.
جەواد حەیدەری
