خانه / پێشنیاری ده‌سته‌ی نووسه‌ران / ماڵی كتێبی كوردی؛ پێگه‌یه‌ك بۆ ڕێزگرتن له‌ كتێب

ماڵی كتێبی كوردی؛ پێگه‌یه‌ك بۆ ڕێزگرتن له‌ كتێب

ماڵی كتێبی كوردی؛ پێگه‌یه‌ك بۆ ڕێزگرتن له‌ كتێب

زۆرجار مرۆڤ ده‌توانێ به‌ داهاتێكی‌ كه‌م و به‌ هه‌ژارانه‌ خزمه‌تێكی‌ گه‌وره‌ بكات. ماڵپه‌ڕی ماڵی كتێبی كوردی‌ ته‌نیا ماڵپه‌ڕێكه‌ ساڵانێكه‌ خزمه‌تی‌ کتێبی كوردی‌ ده‌كات، كه‌م كتێب هه‌یه‌ له‌م ماڵپه‌ڕه‌دا ئاوڕی لێنه‌درابێته‌وه‌ و قسه‌ی‌ له‌سه‌ر نه‌كرابێ. ئه‌مه‌ جگه‌ له‌ بابه‌تی‌ ره‌خنه‌یی و لێكۆڵینه‌وه‌ی‌ ئه‌ده‌بی. ماڵپه‌ڕێك به‌ هه‌ژارانه‌ و خۆبه‌خشانه‌ ئه‌و هه‌موو كاره‌ جوان و ئاست به‌رزه‌ ده‌كات. لێره‌دا ئاوڕ له‌ ماڵی‌ كتێبی كوردی‌ ده‌ده‌ینه‌وه‌ و خاوه‌ن ئیمتیازی‌ ئه‌م ماڵپه‌ڕه‌ له‌باره‌ی‌ كار و چالاكییه‌كانیانه‌وه‌ ده‌دوێن.

ماڵی كتێبی كوردی یه‌كێكه‌ له‌و ماڵپه‌ڕانه‌ی شایسته‌ی رێز گرتنه‌. ئه‌م ماڵپه‌ڕه‌ له‌وه‌ته‌ی‌ دامه‌زراوه‌ به‌رده‌وام كار له‌سه‌ر كتێبه‌ كوردییه‌كان ده‌كات. ماڵپه‌ڕێكی ده‌وڵه‌مه‌ند و چالاكه‌ و به‌بێ جیاوازی ناوچه‌یی كار ده‌كه‌ن و ئاوڕ له‌ هه‌موو نووسه‌رێكی كورد ئه‌ده‌نه‌وه‌ له‌ باشووربێ یان رۆژهه‌ڵات، رۆژئاوا یان باكوور ئه‌وه‌نده‌ی ده‌ستیان پێی رابگات خزمه‌تی كتێب و نووسینی كوردی ده‌كه‌ن. له‌هه‌ر بوارێكدا بێ كار له‌سه‌ر فه‌رهه‌نگی كوردی ده‌كه‌ن. پێگه‌ی ماڵی كتێبی كوردی، یه‌كه‌مین و ته‌نیا پێگه‌ی تایبه‌تیی كتێبی كوردییه‌، كه‌ وه‌ك ناوه‌ندێكی سه‌ربه‌خۆ له‌ ساڵی ۲۰۱۷ه‌وه‌ به‌پێی مۆڵه‌تی ژماره‌۸۶۹۱۹ به‌شێوازی فه‌رمی له‌ شاری‌ سنه‌ كار و چالاكیه‌كانی ده‌ستپێكردووه‌. بازنه‌ی كار و چالاكییه‌كانی ماڵی كتێبی كوردی، كۆی مژار و هه‌واڵه‌كانی دنیای كتێبی كوردی و كتێبه‌كانی سه‌ر به‌ كتێبخانه‌ی كوردناسی و توێژینه‌وه‌ كوردییه‌كان له‌خۆ ده‌گرێت، كه‌ سه‌ره‌كیترینیان بریتین له‌: رانان و ناساندنی كتێب، ره‌خنه‌ و هه‌ڵسه‌نگاندنی كتێب، كتێب و چاپكراوه‌ی نوێ، هه‌واڵه‌كانی بواری وه‌رگێڕان، داڕشتن، چاپ و بڵاوكردنه‌وه‌ی كتێب و گواستنه‌وه‌ی هه‌واڵ و راپۆرتی پیشانگاكانی كتێب و رێوڕه‌سمه‌كان و دانیشتن و وتووێژ سه‌باره‌ت به‌ كتێب. جێی ئاماژه‌یه‌ كه‌ ئاوڕدانه‌وه‌ له‌ چاپكراوه‌كانی دیكه‌ی وه‌ك: گۆڤار، رۆژنامه‌ و سه‌رچاوه‌ به‌ڵگه‌ییه‌ كوردی و كوردناسییه‌كان، به‌هۆی په‌یوه‌ندییان به‌دنیای خوێندنه‌وه‌ و لێكۆڵینه‌وه‌وه‌ كوردییه‌وه‌، به‌شێكی دیكه‌ی بابه‌ته‌كانی ماڵی كتێبی كوردی پێكدێنن.

به‌سێ زمان بابه‌ت بڵاوده‌كه‌نه‌وه‌

پێگه‌ی ماڵی كتێبی كوردی، بریتییه‌ له‌ ماڵپه‌ڕێكی هه‌واڵی، شیكاریی بە سێ زمان بڵاودەکاتەوە‌ و چه‌ندین تۆڕی كۆمه‌ڵایه‌تیی سه‌ر به‌و پێگه‌یه‌، كه‌ زمانی كوردی، وه‌ك زمانی سه‌ره‌كیی ده‌ستنیشانكراوه‌ و هاوكات بابه‌ته‌كانی به‌ زمانی فارسی و ئینگلیزیش پێشكه‌ش ده‌كات. هه‌روه‌ها مژاره‌كانی ماڵی كتێبی كوردی، به‌ سه‌رجه‌م شێوازه‌كانی موڵتی میدیا نووسراوه‌، ده‌نگ (پادكه‌ست)، ڤیدیۆ، وێنه‌ و پۆسته‌ر ده‌گوازرێنه‌وه‌.

چالاكییه‌كانی بواری كتێبناسی كوردی له‌خۆ ده‌گرێت

سه‌باره‌ت به‌ماڵی كتێبی كوردی خاوه‌ن ئیمتیازی پێگه‌كه‌ بێهنام دوروئی به‌م شێوه‌یه‌ بۆمان دوا: «ماڵی كتێبی كوردی» ناوه‌ندێكه‌ له‌ بواری كتێبی كوردی و كوردناسیدا، كه‌ سه‌رجه‌م كار و چالاكییه‌كانی بواری كتێب ناسی كوردی له‌خۆ ده‌گرێت و ئامانجی سه‌ره‌كیی بریتییه‌ له‌ دامه‌زراندنی گه‌وره‌ترین و گشتگیرترین پێگه‌ی كتێبناسی كوردی به‌شێوه‌یه‌كی پرۆفیشناڵ و زانستی. كار و چالاكییه‌كانی له‌ سه‌ر بۆشاییه‌كانی بواری ناساندن، هه‌ڵسه‌نگاندن و بڵاوكردنه‌وه‌ی دنیای كتێبی كوردی بونیادنراوه‌ و ده‌یه‌وێت به‌ كه‌ڵك وه‌رگرتن له‌و ده‌رفه‌ته‌ نوێ و مودیڕنانه‌ی كه‌ ئیمكانیاتی دنیای ئه‌وڕۆ به‌ تایبه‌ت دنیای ئینته‌رنت و سۆشیاڵ میدیا و تۆڕه‌ كۆمه‌ڵایه‌تییه‌كان ره‌خساندوویانه‌، له‌ بواری كتێب ناسی كوردیدا رێكخه‌ری چه‌ندین چالاكی و كرده‌وه‌ی پێویست بێت و ببێته‌ ئاوێنه‌ی نواندنی سه‌رجه‌م ئه‌و چالاكی و به‌رهه‌مانه‌ی كه‌ دنیای كتێبی كوردی به‌ خۆیه‌وه‌ ده‌یبینێت.

كردنه‌وه‌ی ده‌رگای نوێیه‌ به‌رووی كتێبناسی كوردیدا

هه‌ر له‌سه‌ر كێشه‌ی كتێبخانه‌ی كوردی له‌ درێژه‌ی قسه‌كانیدا خاوه‌ن ئیمتیازی پێگه‌كه‌ گوتی: سه‌رجه‌م ئه‌م كێشانه‌ له‌ كاتێكدا به‌رۆكی جه‌سته‌ی لاوازی كتێبخانه‌ی كوردی و كوردناسییان گرتووه‌ كه‌ رۆژ له‌ دوای رۆژ دنیای دیجیتاڵ و ئه‌لكترۆنی ده‌رفه‌تی نوێ بۆ چاره‌سه‌ری ئه‌م كێشانه‌ ده‌ڕه‌خسێنن و نائاگایی و پشتگوێ خستنیان تا دێت له‌ كاروانی به‌ كه‌ڵكی زانست و ته‌كنۆلۆژیای نوێ دوورمان ده‌خاته‌وه‌. سه‌باره‌ت به‌ پێگه‌كه‌شیان گوتی: پڕۆژه‌ی ناوه‌ندی «ماڵی كتێبی كوردی» به‌ له‌به‌رچاوگرتنی ئه‌م گرفت و ده‌رفه‌تانه‌ ده‌ستی داوه‌ته‌ رێكخستنی كۆمه‌ڵێك هه‌نگاو بۆ پێكهێنانی ماڵێك كه‌ بتوانی به‌ شێوه‌یه‌كی گونجاو كۆی ئه‌م بوار و چالاكیانه‌ له‌خۆ بگرێت و شوێنێك بێت یه‌كخستنی ماڵی كتێبی كوردی و كردنه‌وه‌ی ده‌رگا و ده‌رفه‌ته‌ نوێ و زانستیه‌كان به‌ رووی كتێب و كتێب ناسی كوردیدا، به‌و هیوایه‌ كه‌ بتوانرێت ببێته‌ قۆناغیك بۆ په‌ره‌دان به‌ فه‌رهه‌نگی خوێندنه‌وه‌ و كتێبی كوردی.

ئه‌م پێگه‌یه‌ چۆن دامه‌زرا

سه‌باره‌ت به‌ بیرۆكه‌ی كاره‌كه‌ بێهنام دوروئی گوتی: بیرۆكه‌ی ئه‌م كاره‌ش به‌ر له‌ هه‌موو شتێك له‌ خه‌ون و خولیاكانی دامه‌زرێنه‌رانی ماڵی كتێبی كوردی سه‌رچاوه‌ ده‌گرێت. دوای ده‌ركه‌وتنی ئه‌م ئایدیا و هه‌ست كردن به‌و بۆشاییه‌ی كه‌ ده‌توانێت له‌ پانتایی كتێب و فه‌رهه‌نگی كوردیدا پڕی بكاته‌وه‌، كۆمه‌ڵێك خوێندكاری هاوڕێ یه‌كه‌م هه‌نگاوه‌كانمان ده‌ستپێكرد و له‌ سێبه‌ری هاوكاریی چه‌ندین كه‌س له‌ مامۆستایان و هاوڕێیانی خوێندكاردا قۆناغی یه‌كه‌می كاره‌كه‌مان تێپه‌ڕاند.

سەرچاوە: ڕۆژنامەی کوردستانی نوێ(پاشکۆی ئەدەب و هونەر)، ساڵی بیست‌ و نۆیەم ژمارە(۸۱۴۳) چوارشەممە ۲۰۲۰/۷/۲۲

درباره‌ی ماڵی کتێبی کوردی

همچنین ببینید

نوێترین کتێبی د. فەرهاد شاکەلی بە ناونیشانی «بادەمان بەدەستی ئەو نۆشی» بڵاوکرایەوە

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *