ماڵی کتێبی کوردی
ژمارە ۲۱۴ی گۆڤار مەھاباد بڵاوکرایەوە.
بڕیارم دابوو بە بۆن و بەرامەی چەپکێ لە گوڵزاری نیشتمان، یان بیستنی هەواڵێکی هەست‌بزوێن، تەنانەت خەندەنیگای ژێردەمامکی نەوباوەیەک، کەش‌و‌هەوای سەروتار خۆش کەم. خۆزگەم دەخواست بە لەدایک بوونی شێعرێکی خۆشی‌بەخش لە شاعیرێکی بێ دەرد و زووخاو سەردەقی وتارەکەم داگیرسێنم؛ بەتەما بووم بە سۆزی عەشقی دوو نەونەمام، پیت و وشەکان بێنمە سەما تا لەم گەڵاڕێزانەدا گۆوەندێ ساز کەین بەڵکوو تپەی دڵمان دەهۆڵی شادمانی بکوتێ. بەڵام مخابن … چاوی چاوەڕوانم کوێر، کڕ کەوتوو و تاساو، تەنانەت بۆ سێبووری دڵ، تۆزقاڵێ لە بریا و خۆزگەکانم نەهاتنە دی و چم شک نەبرد! دیسان پاییز، هەمیسان لە پاییزا هوروژمی تێکڕایی چەند پەتای مەرگ و میحنەت و بێ‌بەشی، بەرۆکی ئەم وڵاتەی گرتۆتەوە. لێگەڕێن با لە ڕۆژژمێری خەزانی ئەمساڵ تۆمار کرێ کە شەقام گرژ و مۆن و پەشۆکاو، دەستەکان لێک نامۆن، لێوەکان لە گۆ کەوتوون نەکا هاڵاوی نادیاری پەتایەک، بخزێتە هەناومان و ڕێی نەمان بگرێنەبەر. ڕەشەبای مەرگ بەرەڵدا بووە و دەلورێنێ تا وەکوژێنێ چرای دەماڵان، گوڵستان ژاکاو و گۆڕستان ئاوەدان. فریشتە سپی‌پۆشەکان گەلێ شەکەت و بێ‌بڕست، بەڵام هەر وا لەسەر‌پێ و نەسرەوتوو. دەمێکە بۆنی تەرم و دڵی هەڵقرچاوی کەسەکان دوور لە ئاوەدانی و کۆڕی خزمان جێی بە بێنی سوورەگوڵانی وڵاتەکەم لێژ کردووە، دەمێکە ئاگر کەوتۆتە دارستانی هومێد و خەونەکان. دەمێکە تەقە و نیخەی سینگی کۆڵبەرانی شەکەت بۆتە ئاهەنگی شەو و ڕۆژی کەژ و بەندەنی سەر سنوور؛ گشتی ئەمانە سووچێکن لە دیمەنی دڵ‌هەژێنی ئەوڕۆی وڵات. گرفتی ئابووری بۆتە سەرەکی ترین دۆزی ژیان. سەرباری دەردان گەندەڵکار و ناچیزەکان بێ ڕووبینی و بێ دەمامک ڕۆبوونە سامان و داهاتی شارەکان؛ گەرەکیانە غرور و عیزەتی “ئینسان” بچڕژێنن و دەخوازن وشەی درۆ و ڕیا و فەساد، ببنە ئامرازی گەیشتن بە مراد. با لە ڕۆژژمێری خەزانی ئەم ساڵ تۆمار کرێ، کە لە ڕۆژهەڵاتی ناوین پەتای پڕ ڕەمز و ڕازی کڕۆنا و ئیستبداد بوونە ئاوەڵ‌دووانە و دیمۆکراسی شەقامیان لە سوچێ قۆڵ‌بەست کردووە و گزیرەکانیان بە ئەرخەیانی شاڵاو دەبەنە سەر بنەماکانی داد و عەدالەت. کۆمەڵگا کڕ و مات کەوتووە، وشەی “ئازادی” بۆتە هاوارێکی قەتیس‌ماو لە ڕوح و لەشی مرۆڤی سەردەم. دابین بوونی بژیوی ژیان، جێی بە گشت فاکتۆرەکانی ئەندێشە و خولیای ئینسانی لێژ کردووە. گەلۆ! گەر وریا نەبین ڕوحی کۆمەڵگا کرمۆڵ دەبێ و بێ‌تەفاوەتی دەبێتە کۆسپی ڕێی سەرفرازی و پەتایەکی تەواو عەیار دژ بە کەرامەت و شکۆی ئینسانییەت. پێویستە لە سەرمان سەرەڕای سەدان کەند‌و‌کۆسپ و تەنگەژەی ژیان، بە مشوور و هاودەنگی و هاوخەمی تێکڕایی، بە قەڵەم بە کەلام بە کردەوە، ئیزن نەدەین دڵی کۆمەڵگا لە لێدان بوەستێ و خەم‌ساردی و نوسخەی ” بە من چی” ببنە سەردێڕی کاران. نیچە دەڵێ: ” ئەگەر مار هەموو ساڵێ تۆخ ناوێژێ، زیندوو نامێنێ” کەوابوو لە هەل‌و‌مەرجی ئەوتۆ خۆ تەیار و پۆشتە کەین بە بیری نوێ، شێوازی نوێ، ڕێبازی نوێ. بکەوینە ئەندێش و قورسایی ئەم تەم و غەم و کەسەرە بتاوێنین و ئیزن نەدەین دەلاقەی هیوا بۆ دواڕۆژی ڕووناک گاڵە بدرێ، تا بەرەی داهاتوو ە متمانە و عیلم و زانستەوە دەنگ هەڵبڕن و سروودی سەرفرازی بە گوێی مێژووی نیشتمان‌دا وەخوێنن، ئینجا ڕیز بە ڕیز و شان بە شان ڕێ ببڕن بەرەو گوڵزاری سەربەستی.
سەروتاری ۲۱۴ی گۆڤاری “مەهاباد”
ئەم بابەتە تایبەتە بە ماڵی کتێبی کوردی و بڵاوکردنەوەی بە ئاماژەدان بە سەرچاوە ڕێگە پێدراوە.
