ماڵی کتێبی کوردی
دیوانی شێعر و وتارەکانی مامۆستا هێمن لە دووبەرگ‌دا بڵاو کرایەوە
هێمن، بەرگی یەک، دیوانی شێعر، ۴۱۲ لاپەڕە، قەوارە پاڵتۆیی، بەرگی ڕەق، چاپەمەنی خانی ۱۴۰۰
هێمن بەرگی دوو، وتار و پەخشان، ۴۷۲ لاپەڕە، قەوارە: پاڵتۆیی، بەرگی: ڕەق، چاپەمەنی خانی ۱۴۰۰
چاپەمەنیی خانی لە درێژەی چالاکییەکانی دیوانی شێعر و وتارەکانی مامۆستا هێمنی، لە دوو بەرگ‌دا چاپ و بڵاو کردەوە.
تایبەتمەندییەکانی نوسخەی خانی:
یەکەم:
بە شێوەیەکی شایان و نەفیس، لە قەوارەی پاڵتۆیی، بە بەرگی سەخت و چاپێکی بەنرخ و جزوبەندێکی باشەوە چاپ کراوە.
دووهەم:
هەر دوو بەرگی دیوانی شێعر و پەخشانەکانی، زۆر بە وردبینییەوە، لەگەڵ چاپە سەرەتاییەکانی کتێبەکانی مامۆستا، پێک گیراون و بەراورد کراونەوە و دواتر چەندین جار هەڵەگری کراون.
سێهەم:
وەک لە ڕوون‌کردنەوەی چاپەمەنی خانی‌دا نووسراوە، هەموو هەڵە و پەڵەی چاپەکانی پێشوو ڕاست کراونەوە.
چوارەم:
بۆ دیوانی شێعرەکە، چاوساغی بەیتان واتە کشف‌الابیات ی بۆ دانراوە. هەروەها بۆ بەرگی وتار و پەخشانەکانیش، پێڕستی ناو، یان ناونامە دانراوە.
لە ڕوون‌کردنەوەیەکی لە سەرەتای هەردوو بەرگەکە بڵاو کراوەتەوە، ئاماژەیەکی گرینگ کراوە بە دیاردەی دزێو و مەترسیداری دەسکاری و گۆڕانی بەرهەمەکانی مامۆستا هێمن لە چاپەکانی ئەو دواییانەدا.
لەو ڕوون‌کردنەوەدا، بە هێنانەوەی دەیان نموونە لە دەسکاری و گۆڕانی وشە لە ناو شێعر و پەخشانەکان، بەدەر لە هەڵەی تایپی، تیشک خراوەتە سەر ئەوەی لە چاپەکانی ئەو دواییانەدا بە ئەنقەست یان لە ڕووی ناشارەزاییەوە یان بە هۆی سەپاندنی سەلیقەی ویراستار و هەڵەگر و تایپیستەکان، دەقەکانی مامۆستا هێمن تووشی گۆڕان و ناوردبینی بوون!
هەموو هەوڵی چاپەمەی خانی ئەوە بووە لە ڕووی نوسخە باوەڕپێکراوەکانەوە نوسخەیەکی بێ هەڵە و جوان و ڕازاوە، چاپ و بڵاو بکرێتەوە.
بەرچاوترین تایبەتمەندیی ئەو نوسخەیەی خانی ئەوەیە، بەدەر لە چاپێکی شایان، بە هیچ جۆرێک دەسکاری وشە و شێعر و ڕستەکانی مامۆستا هێمن نەکرێن و لە سەپاندنی سەلیقەی ویراستار و هەڵەگرەکانیش بەدوور بێ.
هەڵەگری و پێک‌گرتنی بەرگی یەک، واتە دیوانی شێعر، لە لایەن دەستەی نووسەران و بەڕێوەبەرانی خانی و بەرگی دوو، واتە وتار و پەخشانەکان، لە لایەن جەماڵ کاڕەشی و ساسان ئاهەنگەرییەوە بەڕێوە چووە.
لۆگۆی ڕووبەرگی کتێبەکە بە ئیمزای مامۆستا هێمن ڕازاوەتەوە.
بۆ داگرتنی ته‌واوی بابه‌ته‌که ببنە ئەندامی کاناڵی تلگرامی ماڵی کتێبی کوردی…
ئەم بابەتە تایبەتە بە ماڵی کتێبی کوردی و بڵاوکردنەوەی بە ئاماژەدان بە سەرچاوە ڕێگە پێدراوە.
