ماڵی کتێبی کوردی
وتووێژێک لە گەڵ تەلعەت تاهیر سەرۆکی پێشانگای کتیبی ٢٥مین فێستیڤاڵی گەلاوێژ
بەڕای ئێوە وەک شاعیر و نووسەرێک، یوبیلی زیوینی یادی فێستیڤاڵی گەلاوێژ چ پەیامێکی بۆ کۆمەڵگای ڕۆشنبیری و کەلتووریی هەیە؟
پەیامی سەرەکی هەر ۲۴ فێستیڤاڵ بریتییە لە ئەوەی کە پێویستە هەموو نەتەویێک، هەموو کۆمەڵگایەک، ناوکە ژیاریە شارستانییەکەی، بریتی بێت لە کولتوور، فەرهەنگ، ئەدەبیات و هونەر. بۆ نموونە شتێک هەیە کە پێی دەڵێن مۆدێرنیتەی مادی کە بینایی گەورە و هتدە، ئەمە گرنگە بەڵام لە ئەوە گرنگتر مۆدێرنیتەی فکری، کولتووری و فەرهەنگییە. ئیش کردن لە ئەو بوارە میللەتان بە زیندوویی دەهێڵێتەوە. دەبێت بزانین پەیامی گشتی ئێمە و ئەوەی کە لە کۆتایی بۆ ئێمە دەمێنێتەوە ناوکە کولتووری، فەرهەنگی، هونەری و ئەدەبییەکەیە. ئەوەی لە فێستیڤاڵی گەلاوێژ گرنگی پێدراوە ئەمەیە.
گرنگیی ئەدەبیات و ڕۆشنبیری و فێستیڤاڵە ئەدەبی و فەرهەنگییەکانی وەک گەلاوێژ لە کوێدان؟
لە حەفتا و شەستەکاندا سیمای ئێمە مامۆستا عەلائەدین سەجادی، هێمن موکریانی و قانع بوو، بەڵام ئێستاش کەس نازانێت لە چلەکاندا پارێزگاری سلێمانی کێ بووە بەڵام هەموویان حاجی تەوفیق پیرەمێرد، تاهیر بەگی جاف و موختار بەگی جاف دەناسن. کەوایە ئەوە دەمێنێتەوە لایەنە کولتوورییەکەیە. دەبێت سەندیکاکانی هونەرمەندان، نووسەران، حکومەت، دەزگا ڕەسمییەکان، کۆمەڵگای مەدەنی و میدیاکان هەموو دەبێت هاریکار بن. نابێت کۆمەڵگای کوردی ناوکەکەی بازرگانی، نەوت و هتد بێت، دەبێت ناوکەکەی هونەر، بیرکردنەوە، فیکر و هۆشیاری بێت.
ئەگەر بگەڕێینەوە سەر بەڕێوەچوونی بیست و پێنجەمین فێستیڤاڵ وەک دیاریکراوە بەڕێزتان سەرۆکی پێشانگای کتێبی فێستیڤاڵن، چەند دەزگای چاپ و بڵاوکردنەوە بەشداریان کردووە و چەندیان کوردین؟ چەندیان کاری بێجگە لە کوردی وەکوو عەرەبی، فارسی و هتد دەکەن؟ و چەند وڵات بەشداری کردووە؟
سی و حەوت دەزگای چاپ و بڵاوکردنەوە بەشداری کردووە. حەڤدەی عەرەبییە کە لە لوبنان، مەغریب، جەزائیر، میسر، سوورییە و عێراق و چاپەمەنییە کوردییەکانی ئێران و تورکیا بەشداریان کردووە. دەبێت ئەوەش ڕابگەیێنم کە لە کۆی گشتیدا ٩ هەزار ناونیشان هاتووە.
ئەم بابەتە تایبەتە بە ماڵی کتێبی کوردی و بڵاوکردنەوەی بە ئاماژەدان بە سەرچاوە ڕێگە پێدراوە
