ئالبومە شیعریو کتێبوو «شپرز یانی من، دنیا، ئەفغانستان»ی بە دەنگوو شاعری وەڵا بیوە.

شناسنامەو کتێبی: شپرز یانی من، دنیا، ئەفغانستان، فەرشید ڕۆستەمی، چاپەمەنی: گوتار، ۷۵لاپەڕێ، ۱۳۹۷ ڕۆجیاری

فەرشید ڕۆستەمی

پێگه‌ی هه‌واڵنێری ماڵی کتێبی کوردی-ئی کتێبە بڕێ شیعرێ کورت و درێژێش چەنەنێ و هەوڵش دان فەزایێوە تازێ شیعرەو ئارۆینە پێشنیار بدۆ بە ڕەوتوو شیعرێ تازێ هەورامیێ. دۆخێوە کە شاعر تەجرەبەش کەرۆ دلێو دەقەکانە، هەر ئانەنە کە بەشەروو ئارۆی تووشش بیەن و ئانەیچ گێڵۆوە پەی ژیوایێ شپرز و ئاڵۆزی بێتاقەتی و سەرگەردانیێ کە لکەش واردێنە چەنوو بڕێ مەفهووما پێسەو: بەشەر، ژیوای، مەردەی، وەشەویسی، وەڵات، کۆمەڵگا، سیاسەت و..

دیارا شیعرەی هەورامیە وەڵینێوە پەڕش هەن جە شیعرەی کلاسیکەنە. دلەڕاسێو ساڵەکاو شەسی کۆچی ڕۆجیاری یەکەم دەقە تازەکێ بە هەورامی منویسیا و دماتەر ئی ڕەوتە دەواش بیەن و تا ئارۆ شاعرێ عالێ و ساحیب دەنگێش دیێنێ وێشۆ. ئی کۆمەڵە شیعرێ بە نیسبەتوو دەقە وەڵینەکا تاوانش بڕێ پێشنیارێ تازێ جە فۆرم و دلێنەنە بدۆ بە شیعرێ ئارۆیانێ هەورامیێ و تا ڕادێوە ڕچەو شیعروو وەڵێو وێش ماڕۆ و وەردەنگی هەورامی چەنوو شێوە نویستەیێ تازەی ئاشنا کەرۆ.

فەرشید ڕۆستەمی وەڵتەر شانۆنامەو ” در انتظار گودو “یش کەردەن بە هەورامی و ساڵەو ۹۵ ڕۆجیاری چاپ بیەن. بە سۆرانیچ شیعرێ نەوێ منویسۆ وەلێ تا ئیسە کتێبە شیعریش چاپ نەکەردەن. هەرپاسە جە گۆڤاروو ڕۆنامەکانە بەردەوام وتارو یاداشتش سەروو شیعر و ئەدەبیاتی وەڵا بیەنۆ.

ڕیک وستەیو ئی ئالبۆمی زەحمەتوو “موسلێم ئەحمەدی” بیەن و مووسیقیەکەیچ تراکێوە جا کارەکاو “نصیر شمه”ین

ئالبومە شیعریو ” شپرز یانی من، دنیا، ئەفغانستان” بە دەنگوو شاعیری پەی یەکەم جاری جە لایەنوو یانەو کتێبی کوردیوە وەڵ بۆوە و هەر ماف و حەقێوەش پەی ئی یانەی پارێزیان.

بۆنەو وەڵا بیەیوەو ئی کتێبی، سایتوو ” یانەو کتێبی کوردی” پیرۆزبایی ماچۆ بە شاعیری وەشەویسی، فەرشید ڕۆستەمی و دەسوەشیش کەرۆ چەنە بۆنەو دیاریەکەیشۆ.

? وەزنایرەو ئالبۆمو شیعری «شپرز یانی من، دنیا، ئەفغانستان»

ئەم بابەتە تایبەتە بە ماڵی کتێبی کوردی و بڵاوکردنەوەی بە ئاماژەدان بە سەرچاوە ڕێگە پێدراوە.