ناساندنی کتێبی «تاسەی قەڵەم»

ناساندنی کتێبی «تاسەی قەڵەم» بەرهەمی عەزیز وەلیانی

 ناسنامەی کتێب: تاسەی قەڵەم، عەزیز وەلیانی، چاپەمەنی گوتار، سەقز ۱۳۹۷.

مامۆستا عەزیز وەلیانی

ئەوەی ڕاستی بێ لە سایەی گۆڤار و چاپەمەنییەکان ـــ بە تایبەت گۆڤاری سروە و مەهاباد ـــ دەمێک بوو ژمارەی وتارەکانم بەرەو هەڵکشان بوو، بە چەشنێ کە بۆ ئاوڕ دانەوە لە دەقی وتارێک دەبوو لە تەنیشت کتێبخانە شپڕێوە و بچکۆڵانەکەم هەڵتووتوکێم و سەرلەبەری گۆڤارەکان بێنمە ڕوو و پێڕست و لاپەڕەکان بەسەر کەمەوە تا وتاری دەست‌نیشان کراوم دەدۆزییەوە.

جار هەبوو دۆست یا هۆگرێکی قەڵەم لە پێی‌و‌شوێنی وتارێک‌دا ژمارە و ساڵی چاپی لێی دەپرسیم چ وڵامێکم بۆی نەبوو.

کەوابوو لێبڕام زۆربەی وتارەکان بە پێی ڕێکەوتی چاپ و بڵاوبوونەوەیان ڕیزبەندی بکەم و لە توێی ئەم کتێبەی بەردەستان«تاسەی قەڵەم» بە چاپ بگەیێنم.

“تاسەی قەڵەم” لە قەتعی وەزیری و ٦٥٦ لاپەڕە لە خۆ دەگرێ و لە لایەن نەشری ژیر و چاپی «گوتار» لە ساڵی ١٣٩٨ هـ کەوتۆتە بازاڕ.

ئەگەر لێم بە ئیراد نەگرن و نەبێتە ڕووهەڵماڵاوی؛ ئیزن بدەن ئەم ڕاستییە بدرکێنم کە ئەم کتێبە کۆی ئەزموونی نووسینە لە بەستێنی وتاری: تەحقیقی، هەڵسەنگاندن و نەقد، سەروتار، تەحلیل خەبەر ـــ وەک فاکتۆرێکی گرینگی ڕۆژنامەوانی ـــ و … . لە دوایی کتێب ٤٧ لاپەرە تەرخان کراوە بە وشەنامە، تا خوێنەران بەتایبەت گەنج و لاوەکان بۆ مانا و لێکدانەوەی وشە لە ڕستەدا دانەمێنن. 

هیوادارم کەلکی پێویستی هەبێ و ئاواتەخوازم ” تاسە”ی حەز و ئامانجتان بە “قەڵەم”ی هیوا و هومێد بێتە دی.

تاسەی قەڵەم

لە کەش و هەوای ئەوڕۆی وڵاتەکەم قەڵەم چۆن بسەکنێ کە لووزەوی فرمێسکی چارەڕەشان بەری سووتانی دڵ ناگرێ؟ قەڵەم چۆن لە نووسین بوەستێ کە هاوار بۆ نان و ژیان لە بن باڕستی ڕنووان دەخنکێ؟ یان نیخەی سینگی کۆڵ لەپشتێ بە تەقەی نگریسێ بۆ هەمیشە دەوەستێ. قەڵەم چۆن ڕۆبندرێ کە مەنجەنیقی مەینەت و بێ‌به‌شی و… گەنج و لاوانی وڵات تاو دەدا کە ڕا کەن بەرەو هەندەران، بەرەو چارەنووسی نادیار. دە جا، قەڵەم! بە نووکی بە بڕشتت کێوی غەم و پەژارە تێک‌ڕمێنە و پێ بنێ هەرێمی هەراوی هیوا و هومێد بۆ نەخشاندنی کۆشکی تاسە و ئاواتە پیرۆزەکانت. سەرلەنوێ، دیسان بنووسەوە بۆ نەمانی شەڕ، بۆ نەمانی دەرد و میحنەت، بۆ یەک بوون و ڕێز لە کەڕامەتی ئینسان. بنووسە بۆ هەورەکان بەخوڕ ببارێنن؛ با لە جێی گۆلاوە شلوێ و لیخنەکان، جاڕەگوڵی سەربەستی بڕوێن. بنووسە لە پێناو تاسەی وڵاتێکی پڕ شکۆ و ئاوەدان. بنووسە پیڕۆزبایی لە بەهارێکی هەتاهەتایی.

! ئەم بابەتە تایبەتە بە ماڵی کتێبی کوردی و بڵاوکردنەوەی بە ئاماژەدان بە سەرچاوە  ڕێگە پێدراوە.